Hostel & Capsule

　　已經隔好幾個月，不過我覺得呢個咁特別的回憶真係應該要記住…

　　上半年係日本旅遊及公幹加埋超過 2 個月，由於大部份時間一個人所以好多新鮮事物都可以放心去試，而住宿就係其一。係名古屋住過一次 Capsule Inn，其實入住的決定來得比較突然，全因我覺得當時住果間酒店唔舒適但又唔肯換房我先漏夜走出去搵 Capsule。

　　間 Capsule 係 TripAdvisor 上有好高評價，我個人都覺得唔錯。入去睇一眼個格局十足返去大陸按摩咁，超迷你 lockers 真係唔係俾正常旅客用，相信客源主要係因趕唔到尾班火車的上班人士，另外重點當然係…Mens ONLY….不過放心，呢 D capsule Inn 真係正行生意，無色情成份的，哈哈~~~對於我來講 3000 Yen 有找無乜可以投訴，唯一覺得唔 OK 係睡眠空間內冷氣唔夠，比較怕熱的我真係熱出汗 =.=

　　除了 capsule，亦住過 hostel，呢次係誤打唔撞搵到的。呢兩個月的 trip 我絕大部份時間都係「明日要 check out，今晚先 book 明日的住宿」，呢招大部份時間都 work（黃金周都試過但幾乎一間都冇），上網無意中見到有個 hostel 連稅都只係二千 Yen 鬆 D，我原意係因為第二朝要去淺草出發到鬼怒川溫泉想住近 D 先去，但諗唔到出乎意料地好。

　　係日本之內我總係覺得好安全，其他人物品亂放都冇人會郁，住 hostel 的感覺就更加好，而部份管理較好的更加係 TripAdvisor 中得到好高評分。我係淺草住果間係訓碌架床的，一房 4 人，我起身之後先發現房內竟然有一個是女的….我住呢間 Khaosan Original 係呢個 chain 內最舊果間，size 最細，但佢最近隅田川，日間可上天台飽覽附近風景；之後我去完日光返來走去住 Skytree 同淺草中間的 Khaosan Annex，有種 capsule 類型的睡眠空間但我覺得非常舒適，非常巧合地兩日前係 Original 同房其中一人竟然都出現係 Annex 當中，而我 check in 當日正好有 party 活動（happy Friday??），好熱鬧，我鐘意…第三次就係飛返來香港前 last day，因為 Annex 無位唔能夠連續住兩日所以搬去 Khaosan Ninja，由於我前幾日都將大行李放在東京 Office，今次臨走前要搬返來於是我去 book 獨立房間（當然 toilet & bathroom 仍然係房外 shared 那種），整齊企理的獨立房間都只係 3500 YEN 去邊搵？？？住 Hostel 呢幾晚我見唔少都係打算在日本逗留幾星期但只 book 頭幾晚的 hostel 然後先慢慢再諗做乜好，我幾 buy 呢種玩法 😛

　　我最記得有見過疑似外籍傭工打掃 hostel，直到我住 Ninja 時見到 poster 先發現，原來 long stay（指大約留一個月）客人係可以選擇每日中午做 3hrs 清潔去換取免住宿費（但都要經過挑選的），呢招真係高明！！

　　Anyway，係日本我由二千 Yen 住到超過三萬 Yen 一萬的都試過，平未必唔好，而且對於單身旅

客來講呢種旅遊方式先係真正 relax，我唔鍾意玩到定晒行程好似趕鴨仔一定要走晒咁，我覺得呢種經歷絕對難以忘懷。