再去京都

    相隔一星期，今次仲有個美國同事一齊，早幾日都係豐橋市開工，其實都幾悶下，所以 weekend 唔駛開工就即刻搬出第二度，由於今次比較遲計劃所以地理上頗近的京都再次列入選擇。

    咁…當然人梗有 D 私心，我上星期去過的地方都盡量無再去，不過實情景點眾多時間又少，點樣都睇唔晒的，反正個美國同事都係第一次來日本就無乜所謂啦。第一日夜晚先到京都就無去景點，反而係帶佢去下 shopping mall 睇下日本 D 店係點樣。第二日就買 bus pass 周圍去，但都以市內為主，先去清水寺附近行，離開清水之後係小巷不斷穿插行好好好耐之後去到祇園附近食飯及坐車去到京都市比較外圍的地方－金閣寺，確實係好優美的景觀，同事有帶 DSLR 都影唔少相。後尾打算去德川家點知過了開放時間，改為去花園睇下兼且再坐車到河原町睇果條正到爆的鴨川（我上星期都有來過但覺得真係好正所以再來），估唔到咁就已經下午五六點，day 1 就咁結束（京都入夜景點全收咁滯）。

    Day 2，即係今日，索性玩遠 D，坐山陰線 JR 去嵯峨野及嵐山，果度更加係鄉郊中的鄉郊。行過渡月橋去到嵐山公園後一直上，過埋最高觀景點後見有山路上，我同個同事都諗會唔會再上可以「欲窮千里目，更上一曾樓」，點知當然唔得啦，不停咁行大半個鐘都唔到尾，仲要一直被樹包圍，係認為無「前景」情況下唯有打退堂鼓，但都行到身水身汗。落山食飯順便避下午間猛烈太陽，之後行過天龍寺，經竹林小徑後有大河內莊，據說係某日本以前某位知名人士花三十年時間建出來的別墅，真係大到無人有，又係行好好好好耐先兜得完一個圈。初時諗住坐埋觀光火車兜多個圈就夠鐘返去，但撞著日本黃金週係無預先買飛情況下自然係買唔到…改為行附近消磨時間順便返去 JR 站走人。下午五點幾返到京都站時間都差唔多剛好，去酒店拿返行李後去坐新幹線返豐橋，京都之 weekend 就此完結…

   我諗呢兩日行的路隨時係多過晒我一年入面步行過的，家下腳已有酸軟感覺 XDDD