京都

    對上一次來京都，都係 08 年年尾的事，而 08 年尾之後再次踏足日本就已經係舊年年頭，仲要只係去東京地區。係呢 16 個月內，我總共去過 6 次東京（最短果次一晚就走），今次趁東京個 job 提前做完，名古屋個 job 又未開始，就「順便」去一轉京都先。有朋友建議話唔駛住入去京都，直接去大阪然後四圍去算啦，但諗下諗下去大阪係遠 D（京都坐新幹線去名古屋最快可以半個鐘就到），同埋既然我目標都係京都就住入去慳返 D 時間啦。

    第一日去到已經五點，都唔去咁遠，只係去酒店附近範圍（其實都行足個幾兩個鐘），沿路都行到去清水寺但入夜收檔…明天請早…第二日就諗到…踩單車，搵酒店租車後立即出發，途中經過小店食個超勁大份 brunch，但兩三個鐘後已餓（京都好多斜路，連踩幾個鐘單車咩都消耗晒啦）。唔跟特定路線，亦無話一定要去咩景點，寺廟去過兩個之後就無乜所謂，反而想踩車深入 D 舊區睇下，最尾去到國家一級河川－鴨川，真係非非非非常之靚，見到旁邊小屋我真係好想第日住果度。

    搞到好夜先去晚飯，大部份店已關門，無意中搵到一間台灣人開的 cafe，老闆娘原來就係果個台灣人，言談間知道佢來京都讀大學，之後工作，直到嫁當地人，咁樣就係京都過了 16 年！！佢話我知京都舊區呢邊生活好 hea 咁，大多數食店近中午先開，但又會入黑就收檔，一日先做果五六個鐘，簡直好似日日都係退休生活…

    Anyway 我只係來呢個古都好少時間（第三日就轉去名古屋準備之後開工），但係感覺好 impressive，可能我真係對繁華生活開始感覺有 D 厭…