近況

　　呢排實在比較少 free time 可以寫，但其實又發生過好多事，當然亦有 D 時候係唔方便寫（我只會係一個人時候先寫 OD），搞到隔咁耐先 update。

　　前篇講到農曆新年前訂了新傢俱，只因趕唔到截單期及新年後我去印度出差，於是變成今個月頭先送來。我狠心地換兩張書檯，同樣地由闊大變成窄身向高空發展的款式，所有線都重新安排並用魔術貼紮好，我將檯下面因為比較多器材所以去宜家再買多個細床頭櫃去改裝，拖板火牛長線盡收其中，唯一會飛出來果兩三條線亦綁好位，連 Mary 都搵唔到機會去咬 😛 咁樣執一執睇落就算張檯亂都唔會有太誇張的感覺…

　　另一件無得留低的就係床，連同床褥都係三年半前住套房買的，4" x 6" 兩個人真係麻麻地，反正床褥凹了要換就把心一橫連床架都換埋。當初間屋裝修時戇居唔記得叫師傅預大 D 位，放唔到 5 呎床，不過 4.5" 都無問題，床闊 D，同時又長 D，我買夠 6.25"，多呢 3 吋先緊要，事關以我身高訓 6 呎床隻腳會凸出，冬天嚴寒時就好慘，買長 D 對我有利。多 6 吋闊睇落唔叫差好多，但實際試又幾好感覺，最大感覺係鬆動得多，而家女友總算唔再投訴睡眠質素欠佳。

　　工作上有少少好事，半年中期檢討老細覺得我應該係 exceeding expectation，期望 keep 多半年有些少升職希望。四月尾有單 project 又會去日本，唔係東京，係去名古屋，暫時計劃好之後放假去關西地區 relax 下，上次我去大阪講緊都差唔多五年前，近年都係去東京多應該要變下陣。張 ticket 仲會 stop over 台灣，係果邊玩多兩日先返，前前後後離港超過一個月 XDDD

　　暫時唯一擔心就係倉鼠珍寶，三十個月喇，老態顯現，我怕佢會係我出差時歸天….