大執

　　其實呢件事應該係新年前做，只係因為訂貨期已過截單日於是要新年後先送貨。前前後後換走兩張書檯同張床，書檯由大換細，反正兩個人各用一張檯就無必要用舊果兩張大檯（舊檯一係住套房時買的 4ft 闊書檯，方便二人同時用；另一長檯係朋友搬屋唔要的，果陣剛搬出正常 size 單位所以分開用）；而床當然就由細換大，兩個人用 4ft 仲要我咁鬼肥點得？！度好位買 4.5ft，數字上只多 6 吋但原來舒適度差好遠，今次我仲要係買單純四腳棟起果種，可以自由係床底下收藏大量物品，比傳統揭床板式好用好多（女友要拎物品都唔駛等我返屋企先）。

　　床就出現 delay，下星期先有貨，都好，今日專心搞書檯免得亂。俾錢師傅拆及送走其中一張舊書檯（又重又難拆果張），同埋砌一張新的，剩低果張台就我親自操刀~~無錯就係實惠買的檯，舊果張其實都係實惠買的，我早已砌過，今次作好準備返公司拎定電螺絲批加速作業，唔駛一個鐘就整好女友果張檯。

　　換檯少不免丟雜物，今次好有心幾執乾淨間房，真係唔講得笑原來都幾浪費精神，中午一直搞到晚飯時刻都未完，而呢刻我部電腦都只係臨時著返來用，打算等下星期換埋床塞好雜物後再引入新的儲物組合先重新佈局，但女友果邊就順利整好，連 D 線都紮到靚晒唔會周圍飛。

　　第一次感受到係屋企仲累過出街 XD