咁就過完年

　　呢個新年，應該係呢十年八年中最無新年 mood 的一次。唔係有事發生所以唔開心，而係實在平淡到自己都無法相信。自從搬入粉嶺後，新年期間已經少出去，早幾年阿公阿婆走埋之後，連年初二的開年飯都只係搞過一年就無再搞，我亦懶得去拜年啦….唯一比較特別就係紅假果幾日有一晚特登開車同女友出深水掃街（當晚返屋企後先知食環署都有出去趕客）；另一方面就係帶 Mary 睇過兩次醫生，好彩係醫生話摸唔到有大的骨折問題，第一次食幾日消炎止痛藥後見佢精神恢復唔錯，第二次覆診後有返平時八九成的舉動，相信好快就會一切正常。

　　假期我亦有返一日工，叫賺下外快咁啦，再加上九日假後（初五初六係公司特別送的假期）第一日就立即到印度出差，自不然會令我覺得呢個根本唔似新年。

　　新年開始咁多日幾乎日日都有出車，開始熟習個操作以及路面的感覺，唯一需要改進就係認路同埋空間感，因為睇地圖個 navigation 教我例如前方 200m 轉彎之類我總係會無啦啦早或遲轉（我真係唔知究竟幾多先叫 200m :P），初八果日去青衣探個剛生 B 的朋友及出佐敦兜到我團團轉 =.= 要諗下點先改善到呢個問題…