又走一個

    自從之前的小爭產事件（就是女友爸爸過身後內地遺下來不多不少的），女友同佢阿媽阿哥關係更差。我能理解女友對佢媽的怨恨，窮不是原因，偏心才是致命傷，當女友讀中學沒飯吃時阿媽反而繼續俾錢阿哥去買老麥（仲要呢個阿哥好似有情緒病咁成日對佢家姐阿媽郁手郁腳），難怪女友呢十幾年一直都非常唔妥佢兩個。

    不相往來的日子過了一段時間，前幾日佢阿哥打來，話隻兔仔出事。其實好多年前我女友超平價買了寵物店都不想留的兔子－M 仔，不過因為女友同屋企人唔夾流離失所在外於是養了一兩年就放係阿媽屋企，脾氣古怪的大哥竟然又對 M 仔出奇地好，連同佢家姐隻八哥一齊係同一屋簷下過了好幾年。

    M 仔今年大約 7 歲吧，都算老老地，之前都曾經係屋企因為中暑反晒白眼但一兩日後又無事。但今次唔好彩，極虛弱，女友大哥就帶去睇獸醫，住氧氣箱吊鹽水一日後總算勉強能企返起身自己行。X 光報告見到 M 仔肺部只剩大約 1/3 空間，其餘部份可能係膿瘡或腫瘤，醫生只能當做膿瘡去嘗試，因為腫瘤的話 M 仔高齡做手術係必死無疑，我同女友都應承資助部份醫藥費。聽完病情後自然理解到 M 仔時日無多，住院費貴的情況下只能多住一晚院等佢感覺舒適 D，星期六我同女友一齊去診所探病後，第二日下午佢哥去接出院。女友家姐帶埋 M 仔同居多時的八哥去探病，動物當然比人敏感，睇住同自己住幾年的好友病重佢都係守候於兔籠外。再之後一日，亦即琴晚，M 仔在女友姐姐懷抱中發出幾聲象徵兔子即將離世的尖叫後便停止了呼吸。當時我同女友不在場，不過我諗 M 仔應該無乜大痛苦，最錫佢的果幾位都在場送佢上路。女友對我說養了一兩年就交到阿哥果邊好似無乜負好責任，其實我咁睇，佢只係以 $80 買下寵物店內的 M 仔已經成功避免 M 仔變成棄兔逃過一劫，最終 M 仔都能搵到好的歸宿（不過我都有 D 嬲，佢哥雖然錫 M 仔但經常亂餵食物），以七歲之齡而走算係賺到好多了，當然咁多年感情一下就無一定會失落…

    唔知會唔會有日到我再老 D 時會唔記得晒，所以而家我都經常幫動物們影相拍下片，盡量記下重要時刻等日後睇得返唔會咁易唔記得…