終於搞掂!!

　　又再一次要朝早五點起身，同個師傅出去學最後一堂然後考路試，次次考朝早真係好鬼辛苦，我思疑緊半年前衰果少少係咪因為自己唔夠精神所以先至反應唔切（都開始明點解疲勞駕駛會咁大鑊）。

　　之前掉頭泊位 OK 所以今次只需要係路試上補飛，地點由原來的忠義街變成天光道，我係第三 group 考生，於是自然會企埋一邊睇下其他人做成點。師傅話呢個場難考確實無錯，晨運客、學生等都愛衝出馬路抄捷徑，有時考車牌的真係唔知可以點 再加上考場內的停車位居然有唔少車出入，對於少經驗的人來講絕對係一種壓力，眼睇住有幾位未出大路已經肥佬（有 D 太明顯問題連我呢個新仔都睇得出好有問題…例如係倒車時撞到雪糕筒…），到我開車時都格外小心。

　　個考官又鍾意出口術嚇人，兩次轉彎時都叫我唔駛轉得咁大個彎，嚇得我以為架車踩界，但望倒口鏡又唔覺喎….一於唔理，我繼續用自己方法，終於返到試場。緊張地去接過 result slip…呼…總算搞掂，成功升呢變成 P 牌仔