2013 超級聖誕節

　　熟悉我的，都知我唔興選擇旺季出遊，一來貴，二來去到又係見返一班香港人感覺唔似去緊旅行 😛 寧願玩少幾日都唔想掃興，加上返呢份工儲落假期多到用唔晒，向來都係頭痛點樣先有假放多過夠唔夠放。不過呢個 2013 聖誕節，卻係例外…

　　新部門調職準備功夫已做完，只待結果，對家阿頭表示樂觀，相信問題只出於我需唔需要減人工過檔而已。反正年假多到爆，決定用下手上儲落 airline mileage + hotel points 作一個慳錢聖誕自助遊，換了 10 晚免費京都 + 大阪 Hyatt Hotels 及兩張 business class 機票同女友去日本關西，屈指一算我只需要付出千零蚊就可以有六七萬蚊的享受，都抵 😀

　　天氣係一個問題，京都果幾日都落雨搞到乜都做唔到，好慘…但亦因此改變了整個 trip 的方向：以飲飲食食為主題，反正無機票酒店價錢包袱想食乜都得；另外就係 shopping，作為 IT 人當然少不免會對各樣日式 gadgets 感興趣，雖然我都係 window shopping 為主，但係有時見到平價過癮 gadgets 時都忍唔住出手（買了好多平時 Logon 標價貴幾倍都未必買到的座檯飾物）。連同朋友搭單買呢樣果樣（我承認好多都係朋友俾我即時報料資訊毒親 XDDD）足足搞到有 70KG 行李，好多物品一式幾份，估計過海關 x-ray 檢查時會誤以為我係職業水貨客 😛

　　24 號夜晚出發，剛才先返到香港的我終於明白咩叫行到腳跛，好多時連我女友都頂唔順 😛