聚舊的婚宴

呢幾日都冇習補,搵工方面又未有消息,前幾日見的工恐怕又再泡湯。今日又再約Alex出來簽番張form,講番那件事,佢都覺得那人有好大機會講大話,因為佢之前做的事實在很難令人再相信佢,唉,不過又冇証據証明佢講大話,唯有等個天收佢!

夜晚去左麗豪酒店出席觀中舊同事Jebb的婚宴,除左一直有聯絡開的舊同事外,仲見番兩個觀中舊同事,自從離開左呢間學校後,除左較熟的一班外,都冇見過其他同事,再見番都係寒暄幾句!今晚仲可以見番教院同事Grace,之前已經知佢會來,自從離開左教院後都冇見過,真係好懷念昔日一齊食飯的時光!

每次去飲我都係採取「留前鬥後」的策略,前面幾味都唔係我杯茶,去到雞先係我出動的時候。今晚上菜特別遲,去到麵飯我圍檯已經走左三分一人,上甜品時已經冇左一半人,所以美點雙輝我就拎左一大半返屋企,本想食多兩粒湯丸,但諗起自己的身體不宜多食,所以都係忍口!不過見到咁多野食冇人食真係好浪費,所以我都盡力食晒自己那份!返到屋企已經十二點,好耐未試過咁夜返屋企!