黑到冇朋友

真係黑到冇朋友!!!!!!之前搵agent接左份補習,係國際學校的地理科,考GCSE,睇過個課程,比文憑試淺少少,個agent都話個學生的其他補習老師都冇教過個課程都補得掂,所以決定接左份補習。上到去,個學生問左我關於課程既一d野,我答完佢就話我唔係好適合教呢個課程,之後又話佢前一日已經搵左個補習老師,佢好熟悉個課程,所以唔需要我,我問咁點解冇人話我知,點解仲要我上來?佢一時話通知唔切個agent,一時又話個agent要佢比我上左來先,點都好,點解要咁玩我?佢話可以比番車錢我,但就同我斤斤計較,我話要拎番$30,但佢話就算去最遠的地方都唔駛咁貴,最多只係比番$20我,雖然我既車費來回都係$20左右,但我比你咁耍法,你又讀國際學校,住既屋大我屋企三倍有多,勉強都可以叫豪宅,要你比多少少都唔算好過分丫?你竟然為左10蚊同我計,算,我唔同你拗,我廢事比人覺得我好似乞兒咁!(唔怪得d人成日話越有錢既人係越孤寒)呢單亦都係繼上次補少10分鐘扣我錢之後另一經典事件!

當時我真係好想喊,一來係唔知點解自己真係咁黑仔,今年黑事件真係多到數唔晒,二來係點解機會都唔比我就certify我,如果我做得唔好比人炒都話活該,但而家未開始就判我死刑,我真係好唔甘心,不過除左黑仔之外,還有其他因嗎?

希望呢排的一切黑仔事,能換來點點好運給我吧,否極了,可否給我泰來?