Confirm and Accept

星期六和日也同阿衡出去玩，星期六比較好天我們就去左赤柱閒遊下，第一次由銅鑼灣搭小巴去赤柱，都係一個新體驗黎o既，不過比起由西灣河出發就好似用多左時間o既，但都無咩野，我們係小巴都傾得好高興，本來一朝早遇到d令人生氣的事，但盡量叫自己唔好被影響心情，有咩唔順意的事就快d避開！

去到赤柱第一時間就食左個度好出名的西多士，本來我都唔知個度有間茶餐廳 ﹝其實都唔算係茶餐廳，因為佢只賣西多士公仔麵o既野，只能講係一間冰室﹞，因為佢表面上係一間賣生果的舖頭，唔望清楚都唔知佢係有得食野。

我地叫左西多士、沙爹牛旦通和凍奶茶，好彩個日唔算好熱，有少少風自然吹入黎，雖然環境係一般，但都幾寫意^^。可能心情好，就算落單的阿姐有少少晦氣，但我地都只係當係笑話一則^^，咁個西多士的確幾好味，熱辣辣又香呢。

食飽就正式開始我地o既探索之旅！我地一路向水上中心的方向出發，個d地方以前黎赤柱係無去過的，阿衡也一樣，因為佢多數只去沙灘曬太陽和游水，其他地方都好少去，我地慢慢行過去水上活動中心，係個碼頭影左一陣相，其實無無聊聊都可以玩得好開心，至緊要那個人肯陪你投入，我都覺得阿衡好開心，我專登帶埋相機出黎，諗住可以唔洗行咁悶，可以玩下影相^^，淨係企係個碼頭都玩左好耐啦，快樂的時間係特別容易滿足架^^

我們再慢慢行返去美利樓個邊，本來想入去赤柱炮台個度，但又唔知要行幾耐，唯有等下次先再入去看看啦^^。

行返去美利樓個邊都差不多日落了，我們個邊行下影下，天氣不太好，看不到最美的日落，不過有埋阿衡一齊hea已經好足夠，根本不需要任何特別活動也很快樂呢！

以前總覺得拍拖像缺了些甚麼，明明係有男朋友，但一路都感到孤單，好似自己的喜怨哀樂都無人會理會和明白，花左好多時間去令對方明白自己，但到頭來只換來一肚氣和不理解，其實我一路都知問題係邊，只係覺得大家一齊係可以用時間去遷就o既，但日子耐左，還有咩係可以改變呢？2個人怎樣相處，相處得好唔好，都好基於2個人的性格和價值觀，有些人會比較容易明白對方說話意思和想表達咩情緒，但有些人卻將同一句說話意思演繹成另一個意思，加上性格不同，結果好地地一事件也可以是鬧交的導火線。

我不想再下去了，有時值唔值得唔係用時間去衡量，不要牽強自己，多想長遠一點，快樂才是重點。

阿衡plan同我去赤柱時都問下我夜晚想食d咩，佢本來諗住食德國野，但因為份量太多，我覺得一定食唔哂d食物，不如去另一d餐廳吃吧，阿衡都有兩手準備呢，去左一間叫「小天使餐廳」，係市集裏尋找呢間食店也是一個樂趣呢！我們的歡樂都係小事上發生，我很享受這種樂趣和相處方式。

基本上我們的關係也很迷離，我們現在是朋友關係，但話裏行間卻像認定了對方似的，我們有時會喝同一支水食同一碗麵，沒有拖手卻行得勁埋，像緊貼地走路一樣，但對女仔黎講，點都是男仔主動一點比較好，或者他覺得未係時候吧？或者佢覺得現在已經係？但點都好，女仔係要看定一點，點都要有個confirm先可以accept。