人生…無從預計
尋日阿衡要retest driving，佢一take搞掂啦，還專登打比我叫我話比阿sir知佢合格啦，順便約我去食lunch。
同佢去左街市食，之前都叫佢帶我去架，因為想陪佢去d佢會去的食店，我地食左麵，阿衡還幫我下主意添！因為佢知道呢間麵店出名食咩，分別係雲吞、叉燒、豬頸肉、雞絲和牛肉。第一次男仔幫我楂主意啦，覺得好得意^^，佢係想將佢覺得好味o既介紹比我呢！
又食又傾左一個鐘了，返到去先知原來阿衡未報比阿sir知佢幾點回局，阿sir一定緊張少少，因為怕比人問麻，不過係普通員工黎講，其實係有空間去做呢件事o既，阿sir角色當然要執正黎做啦，阿衡都勁唔好意思。如果我知道呢件事，一定會叫阿衡執正黎做o既，真係唔想為左少少事比人抽升到！都係小心為上啦。今日車更剛剛又滿了，變相阿衡無得跟車了，都唔知做咩好，如果西灣河要人就要去個度頂更了，當然阿衡就唔想啦，只好叫佢放假啦，但阿衡唔想放，不過最後都要迫放假，因為問過其他人無人想放…..
阿衡好似有點唔開心咁，佢都有message我，雖然無講d咩，但我感覺到佢有點失落架。於是叫佢做一陣運動先，放工等埋我一齊走吧^^
差不多5:00pm，阿衡著哂運動衫跑返局沖涼，順便等埋我放工。嘩，見到佢由頭濕到落尾，還以為出面落大雨添呀！我知道運動可以令心情好d，做下運動又對身體健康呢，同埋我都好鐘意男仔有運動細胞，喜歡做運動的男仔特別吸引我^^
我地去左灣仔行電腦城先，因為我想買多條叉電線，阿衡又手多多買雞蛋仔，結果未食飯先食飽^^""。在電腦城買不到我想要的，就轉戰去了188，終於比我買到綠色的叉電線！好靚呀，其實買呢d野除了能夠發揮佢應有作用外，外貌也是我決定扑鎚的主因！綠色，果然好靚呀^^
今晚食吉野家打邊爐，好耐無食過了，對上一次已經係年幾前，那晚和阿俊在APM食，那晚亦是我們最後一餐晚飯，APM是我們承諾守候對方的地方，亦是我們食過最後離別的晚餐的地方…..
時間過得太快了，眨眼就年多，有時望下d相，那個人和自己相處了好幾年，他的喜好我也知道，但就是差那一步，我們都未能順利行過去。這就是命運的安排，人的改變，時間的流逝，都可以出現好多的人生轉變，你永遠唔知將來會點，如果比你一早知都無意思，咁樣係唔會得到快樂的，只要我係呢一刻可以開開心心，和喜歡的人一起渡過，一點一滴都可以累積成將來的順利道路。那時的我，的確比較適合和俊一起，對愛情充滿童話幻想，他能滿足到我，年紀尚輕的我們一起上學學習，能夠在我人生的重大轉析點出現過的你，你是一個重要的人。
我還是繼續向前走，每段路能夠有幸遇到適當的人，我覺得自己真係好幸福，我應該感恩！
臨走前下著毛毛雨，有點唔捨得走，但真係要離開啦，我們相約星期日再出來，是否太痴纏呢？不是用「痴纏」形容，我們還是朋友呢，只係想見多少少啫…..
p.s. 尋晚處理雞眼時，左邊隻腳雞眼已經可以除掉！但右邊個粒仍然厚厚的…..希望不要太痛吧