100%心意

尋日係我生日的大日子！對於又一歲呢件事，我已經變得麻木，最令我覺得奇怪的事，想像不到幾年後我到40歲時真係唔知會點，如果可以keep到依家咁童顏，真係好得人驚，但亦都有咁o既可能….

阿衡專登請假陪我過生日，對呢次的約會我沒有很高的要求，其實只要佢為我做任何事，我都會感覺到佢對我的愛護，咁我就會好開心^^，只要我見到佢，就已經好滿足了^^

阿衡約我左下午係旺角等，奇怪佢好似一早就預左係旺角又一定要係下午，好似好有計劃咁喎，不過出到黎都只係四圍行，人很多亦好迫，不過我地都鐘意咩都講一餐，咁又好易過左呢幾個鐘啦。我們還在寶島食左個下午茶，順便hea下。

阿衡好鐘意睇個d軍裝用品店，d袋仔，迷彩褲佢似乎很有興趣，d爬山露營用品又好吸引佢。阿衡都係一d sporty的人，上次行山佢話非常輕鬆，但我就半死了，跟佢的速度真係幾辛苦，無法啦，我又唔係成日運動>_<

行到差唔多7:00pm就我地去左朗豪坊頂樓食飯啦，阿衡一早訂左枱啦，個間食店係食意大利野的，有pizza、意粉和牛扒食，店內都唔多人，我地叫左pizza、牛扒和沙津，已經好夠我地食啦！食到咁上下，無端端有人拎左個蛋糕出黎，點埋心心蠟燭！

呢個都未算是驚喜，因為生日送生日蛋糕都好平常，我還未深究那個蛋糕的出處，還以為是阿衡一早買返黎，再比間舖頭拎出黎啫，點知原來阿衡是那朝晨早到整餅店自己學整，然後再將「製成品」拎返呢度放低！那個蛋糕是阿衡親手造的！

他還show d相我睇，見到佢著住條圍裙，好得戚咁拎起個蛋糕笑住影相，個刻我真係無諗過竟然有人會為我做呢d野，係我想像不到的事，他從來都未整過甜品，知道我呢幾年生日都無一個自己的蛋糕，所以親手做一個比我。他都唔相信這個蛋糕是我今年第一個蛋糕亦是唯一一個呢。

我不斷稱讚他的手勢，因為個樣真係好似出街買個d，味道又不太甜，很適中！雖然2個人食唔哂個蛋糕，但我很喜歡^^，也很感動。

雖然阿衡條件未必比別人優勝，但我喜歡的不是那些條件，而是那個人是否願意花時間係你身上，錢無左可以搵返，但時間對於一個人黎講係十分寶貴！佢願意為你花青春花心意，證明佢係出自真心的！

我地又談及將來，阿衡覺得我和佢一齊係佢走運，因為佢覺得以佢條件根本都好難有女仔會鐘意(無咩錢)，但我鐘意的並不是外在的素因，有時睇一件事要深入去看，陪你走到人生盡頭的人，係一個能和你雙依雙靠的人！我享受精神上的分享多於物質，或者會比人話我幼稚，但我的快樂都係建築於心靈滿足上，相信能夠明白我的人，自然會知道我想說甚麼。

PS 收到阿衡在日本寄來的明信片了！多謝你洗盡腦汁的文字！看了多篇呢！