我的遺言

***我都唔係有絕症或者諗唔開，只係我都覺得有d野想係自己在生時講，無人知自己有無機會講第時死後想點架嘛，話唔定大吉利事講句搭飛機撞瓜左都唔知咩樹，更何況尋日睇報紙，講有條友爬山，隻手畀大石責住左，諗住死梗，所以用另一隻手搾viewcam拍定遺言，雖然後來佢為左生存壯士斷臂最後冇死到，仲話將段片拍左做紀錄片電影添…「唔係個個人咁好彩係生命可能完結既時候仲有部viewcam係手、仲有閒情逸緻拍片架嘛」***

如果我瓜左，首先要睇下點瓜先啦，有全屍既，我都希望可以捐d有用既器官畀人，其實之前個海關撞爆肝我都想去捐架啦，點知佢咁快搵到啦…另外我希望可以入土為安，我唔想火葬呀，我…怕熱 @_@” 如果冇全屍既，咁都冇法啦，爛頭爛頸咁，燒啦燒啦，燒完我希望可以放係荃灣，方便大家嘛，又就腳又多親戚，大家拜山又可以一炮過唔使走來走去。

儀式方面，其實我又冇宗教信仰，求其得啦，有咁平得咁平，反正我又唔係咩大人物。但我有個諗頭，d賓客來畀帛金，咪要拎返粒糖既，如果可以既話，我唔想派糖，我想派曲奇，反正應該係甜就得架啦可。我想有人幫我焗好多好多曲奇，一來可以特別d，二來可以令人諗起我有焗野既嗜好，懷愐下嘛~ 另外我鍾意天堂鳥，最好要開左個d喎，好靚，好似雀仔咁，好得意~

另外，我希望同晉晉講，未有佢之前，我搵唔到世界上有咩係一生一世，我曾經以為係足球，因為就算女朋友或者老婆，都可能會分手或者離婚，但足球唔會背叛同離開我，我以為我唔會放棄足球，就算唔踢都唔會唔睇唔打機…但係而家，為左你，我已經冇踢波啦，睇同打機都已經極少極少…尤其係教識你識得行之後，我一係電腦台打親機你就要行埋來扭我，仲衰到用隻手指仔熄我機添，搞到我個電驢神神地…@_@” 你係我個仔，呢樣就係一生一世，亦都係我地既「羈絆」。希望你生生性性，係人10零20歲都會有反叛期，我明白係人都唔鍾意畀人標籤，但年青人始終經驗淺，待人處事始終都未能做到最好；做錯事唔係大問題，最緊要係吸取教訓，平心靜氣諗下點解咁樣做會係錯，同埋以後唔好再犯，認真諗下點樣可以避免再犯。堅守3大原則，唔賭唔借錢唔吸毒，唔好睇少呢3樣野，害人不淺架，要有《獨立思想》，唔好聽人話「少賭可以怡情」、「借d錢畀我好快還」、「試下啦唔會上癮」就信，呢個世界好多人靠呃人開飯，可能佢都唔想，係為世所迫，但都唔可以落搭。唉，呢個&

#19990;界咁多人咁多性格，講一世都講唔晒，總之最重要就係要有《獨立思想》同《批判精神》，詳情就參考下唐君毅的《與青年談中國文化》，一世受用架~ 可能你會問我，做咩唔講「我愛你」，呢d野唔講你都知架啦，而且唔用把口講，而係要你用心去感受，呢d先係「男人既浪漫」~

暫時係咁多啦，我人生有2志願，1係30歲前生小朋友，逹成左啦；2係要去利物浦朝聖。如果我不幸生前都未去到利物浦既話，麻煩搵人帶一帶我條屍又好、骨灰又好，去一去晏菲路，最好偷偷地灑少少落球場添啦，圓一圓我既2大心願。

thank you for your co-operation, please stand behing the yellow line~