有大食大

今日約左當年觀中的科主任Molin食飯,佢話要入來大埔影梅花,所以就順便同我食飯。今次去左華輝食,推介佢食蘋果批,佢都話正,不過就越來越貴,如果唔係特別想食都唔會買來食了…..今餐又要佢請我,本來話上次佢請今次輪到我,佢話我失業而佢退左休又有長糧,在「有大食大」的原則下今次又係佢贏,出到呢個原則,我唔會去爭,我諗我未來一段長時間都冇資格同人爭埋單!之後陪佢去影梅花,一棵梅花樹竟然吸引到一班龍友係咁影,零藝術細胞的我真係完全唔明!影完佢仲有時間,帶左佢去鐵路博物館,以前細個成日去呢度,真係唔記得對上一次去呢度係幾時,今日重臨,印象中冇乜點變,館內的一個識郁的模型唔見左,我記得以前好鍾意睇!仲有個第一代電氣化火車的車廂都唔見左。我亦都諗番起以前來呢度的情景,記得自己曾經唔敢在路軌上行,因為驚突然有火車駛來將我車死,而家諗返都覺得好笑!

我要盡快擺脫失業的生活,讓我可以痛痛快快地食一二三四五六…….餐