出師未捷

今日要去教院見工,見之前約番舊同事食飯,真係好懷念昔日一齊食飯嘻嘻哈哈講老細壞話的時光!之後去人事部,又係同一個人負責,唔知點解遇親佢我都有哈碌野發生,今次都唔例外,佢要我填一張前僱主的聯絡資料,點知我懞盛盛寫左自己個名,佢唔肯比過張我填,焗住要刪,最抵死係佢之前叫我睇清楚,點知都係出錯,出師未捷身先死,咁白痴既野都錯得,基本上死得!今日問既野都係差不多,主要問以前份工做過既野,佢竟然冇問我點解唔教書,我都答到唔想再答!今次問得比較少,好似hea我咁,所以我諗應該機會唔大,又要再等!之後考筆試,都唔算難,不過就冇乜位可以發揮,今日就當係返去同舊同事聚舊,IN完就唔好再諗其他野!

本來夜晚要補習,但個學生話捐完血想抖下,之前佢已經講左話有機會要改期,所以有晒心理準備,咁都好,我都唔想咁趕,兼且可以睇下電視,好耐未試過星期二夜晚可以睇電視,星期二檔案唔知skip左幾多集!

自從上星期代完課後,喉嚨就一直唔舒服,呢兩日仲開始咳出痰,究竟係我太耐冇教書個喉嚨唔適應要講咁多野,定係呢幾日凍左,攪到身體抵受唔住?今個冬天應該唔易過……..