連環certify

今日真係由朝踩到晚,朝早去大圍一間中學代課。今日有五堂,先上兩班中三,我一入課室都有少少驚訝,班人D樣完全唔似band one,唔知係咪沙田區太多英中的關係,呢間應該算係英中入面較差的一間,見到佢地我真係有面目猙獰的感覺,原來我之前那間學校的學生真係好乖!呢兩堂都教唔到d乜,班人之前測完驗以為今堂會派卷,所以好少人有帶書,不過我都照講,講左少少比佢地抄下筆記就算!之後上中五,呢班得十幾人,班人真係好乖,雖然我只係代課,但都好專心聽書,算係比番d安慰我!跟住上另一班中三,呢班比之前兩班好少少,多d人聽書,不過氣氛都係麻麻!連上五堂,下晝全空,今日個時間表都算靚!

放工後趕去南昌見工,上天的安排真係好巧妙,本來係今日九點半見,但佢之前改左五點,咁我就可以呢兩日代課,如果唔係就浪費左呢個機會!今日份工係之前寫文寫得我好辛苦的那份,都幾想做呢份工,不過今日見完後就徹底打沉左我,一來我表現真係唔好,佢好明顯覺得我唔夠經驗(講真apply時都知自己唔係好qualify,只係有興趣而博下機會),二來份工要做既同我期望有d落差,所以呢份工又可以certify!一星期連炒兩份工,真係有點心灰意冷,我係咪應該降低要求,求其有份工就算?

見完工要去林村補習,次次去親呢度都要同個學生的兩隻貓搏鬥,人貓大戰每星期都會上演!

踩左全日,好累,報紙又積壓多一日,今個週末將會係睇報紙日