再會了

      歲晚人人準備收爐，估唔到此刻傳來另一消息：OD 即將收檔。老實講我無乜 surprise，有寫開 blog 的應該都仲記得 Xanga 及 Yahoo Blog 等知名度高的都先後收檔，OD 早幾年開始唔多掂，能苟延殘喘到今日實在不容易，只不過 OD Master 似乎無幾多時間，講到好似要一兩星期內關門，要 backup 都好煩。

      我早幾年都曾經去 Yahoo Blog 寫過，文章數不多，內容與 OD 呢邊並不重疊，但我一直都認為心底話放返呢邊好 D，所以上個月 Yahoo Blog 關站時我選擇唔做 backup，但呢邊唔同，OD 舊文對我意義重大，必須要保存。OD 開始時正係我大學剛畢業無耐，初出茅蘆連第一份 full time 工都未有的時候，直到十一年後的今日，直接或簡接透過呢度認識好多人，心靈進化亦有唔少係源於此處，雖然已經唔再有以前寫得咁密，但對於一 D 重要時刻或心底話都會寫落 OD，呢千六篇文真係有血有淚，我亦都會打算保留（唔知搬去邊好）。

      個個都知 OD 對於非英語系 support 好曳，於是 backup 變成頭痛問題，因為 OD backup download text file 之後一開會見到亂碼，但係問題可以解決的，只要使用 web browser（例如我用 Firefox）去開個 backup text file 並使用 Big5 或 Big5-HKSCS encoding 就能睇到中文，到時想點 copy 都得啦。不過呢個做法只適用於 2009 年 5 月前寫落 OD 的文，5 月開始此方法無效，因為 OD database 以 Unicode string 儲存非英語系字元但個 backup tool 唔識改返過去。可以去呢個轉碼網站做人手轉換，copy 堆數字入去再按 convert 可以即時轉換返做中文，當然亦可以人手逐篇 copy 2009 年 5 月打後的文，不過 OD Master 講到好似之後十頭八日就會摺埋，怕做唔切逐篇 copy 的可考慮呢個後備方案。

      其實首頁都有寫，facebook add 我到此 link，由於時間關係我仲未知可以去邊塞返舊文，如各位有意見，或已經搬緊的都可以話我知搬去邊呀（email 的話 send 去 edwardwong80 (at) gmail.com，因為 facebook 太多垃圾 message 所以我好少開樓上果個 mailbox）。

      非常感謝大家呢十一年來對小弟的支持，但天下無不散之筵席，只盼後會有期！

P.S. 剛於 LiveJournal 開了新頁面，唔肯定會否係最終落腳點，初步睇 OK，我或會考慮全數舊 OD 文搬過去。網址是：http://edwardwong80.livejournal.com/