End of 2013

      咁又一年，唔知做咩我覺得 2013 呢個時空好似怪怪的，明明發生過好多事，但實際過去的時間卻係好短。不過我都要承認，2013 年寫的 OD 又比 2012 少，唔知會唔會遲 D 變 monthly 😛

      不過呢，2013 年確又發生唔少 remarkable 的事。最先當然首推「買車」一事，P 牌尚有幾個月就完的我決定買車，為的是想及早適應駕駛的感覺，以便他朝出差有機會用（果然年尾去美國用得著），當然我住得近公司可以免費停泊亦係一個誘因。揀選一架 2002 年產的 Nissan March，車身頗細但卻多次被指與我的高大身形不相稱 😛

      前兩年我都話自既驛馬星動，但回算一下，其實 2011+2012 兩年總和有可能都多唔過 2013，粗略估算後我全年離港日數已超過 110 日（包括公幹及旅遊），有我 facebook 的應該會對呢一點特別深刻印象 😀 2013 總計係：兩星期印度 Chennai，兩星期美國（Seattle + San Francisco），一星期台灣，四日星洲以及….差不多三個月的日本！我記得有位讀 Master 時的同學仔約飯局大半年都見我唔到，但卻係三個月內同我係東京食過兩次飯，哈哈….而非正式統計下，我係日本坐 subway 及新幹線次數比起同年於香港坐地鐵的次數更多….而由於我係兩間 airline membership 有 elite status 可以帶大量行李，又造就另一副業－－走水貨 😛 係日本同美國走返來，拎到我個人都 overload 咁滯。當然儲落的 mileage 及酒店積分就係年尾聖誕時幾乎一炮過全用晒來旅行用，算係 peak season 中最慳家旅遊的一次。

      家中小寶貝們係 2013 年都發生了一些事，大兔 Mary 突然有些許腸塞（可致命並且機會極高的），好彩發現得早及時送去睇醫生解決到問題，可憐佢爸爸「拖肥」在另一收養家庭中就不幸地因為同一問題而於三歲時便上天堂了 :(。6 月 28 日，最後一隻屬第一期在我家的倉鼠「珍寶」陪伴我們 33 個月後在我懷中離世，這一天早上我放下工作，好好陪伴曾經大半生孤獨地過的珍寶走完佢在人世間的最後一段路。雖早有心理準備，但面對果一日來臨時我仍然悲痛莫名。年底時女友通過一網友接收了一隻瀕死中的年幼倉鼠，取名「肥波」，經過悉心照顧近一個月後佢總算恢復健康，佢將會同 Mary、石板街同埋芬達一同住在同一屋簷下（嚴格來講石板街通常住在另一友人家中）。

      公司方面，努力過後，一年兩次 appraisal 都得到 "Exceeding Expectation" 的成績，不過老細竟然反口唔支持我升職，有種被出賣的感覺。之前我一直同佢討論點達到呢個目標，自從佢話唔支持我九月份 appraisal cycle 去試升之後我絕口不提，反而呢個時候佢就成日提住話半年後我應該可以升喇點點

點….我只覺得一切都係鬼話，今年度的 project 我得到數名其它 team 的 project managers 讚賞並寫靚我的 appraisal，佢選擇 support 一個 assign 來香港只係做了幾個月的人去升，根本雙重標準！更何況每年 9 月到第二年 3 月係 project 淡季，好難搵到好 project 來 show 自己的能力，亦即係話明年三月試升只係哄我繼續做傻瓜的舉動。佢不斷強調無升職人工 bonus 都會多，結果一出又係大失所望，加薪後每日多出來的都唔夠買早餐，之後又話我已經係呢個 grade 的「頂薪」係 marginal case….更令我想快 D 離開呢個部門。十一月底時終於向隔離部門遞交 transfer request，我只希望準快脫苦。

      家人方面，我諗算係同兩個妹反面吧，佢會怪我點解唔肯見一個千里從美國返來的阿妹，但唔會去諗點解我嬲佢。我只係好想平靜地生活，我要選邊個做女友做老婆其實與其他人無關，我保護女友免受傷害就被話「為一個女人連阿妹都唔理」；但另一方面佢男友有公事上的問題，卻又打電話要求我「hack 入自己公司 server 去取得佢男友想要的資訊」，唔通佢唔係「為一個男人連阿哥前途都不顧」？Facebook unfriend，咩斷絕往來我都唔理了，事關女友生活在呢種壓力下早已爆煲，睇緊精神科醫生都已經花上我好幾萬元，再係度搞局的話天王我都無面俾。

      新一年願望？我只希望轉 team 計劃盡快成事，俾我早開始新工作然後重上軌道。