珍寶

    2013 年，真正驛馬之年，過去一兩年果 D 完全比下去，六月尚未結束，屈指一算我已經有差唔多 70 日不在香港。離港日子有公幹亦有旅遊，不過除了二月份在印度 Chennai 出差幾日外，其餘日子全係日本！係我離港日子裡面，珍寶一直都係我最放唔低的事。

    2010 年 9 月 24 日，係魚旦仔離開我一星期後，女友就帶了同色的珍寶及帶子返屋企，帶子已於舊年 11 月 10 日離世，而珍寶卻反而意外地成為最長壽的倉鼠（一直都以為帶子肥肥白白係跑出果個），直到今個月，珍寶已經來我屋企 33 個月，計算埋佢出生後要幾星期先會係寵物店被放售，有理由相信珍寶應該只差一兩個月就足 3 歲，對於倉鼠來講算係非常高齡。

    幾個月時間，睇住佢慢慢變瘦，感覺就好似變返 BB 仔來我屋企時果個 size，19 號果晚我返屋企見到佢連步行都有 D 乏力，唔見有正常的大小便，當然想像得到佢餘下的日子唔會多得去邊。佢自己又無飲水只靠我每日一兩次人手餵 + 食菜葉補充水份，以近期極熱天氣來講實在係唔夠，但總算好過無。如是者又過幾日，星期三忽然好天又唔係好熱，加上我可以早收工於是趁天未黑就上樓帶佢同埋芬達（芬達係熊仔鼠，帶子過身後幾日女友領養返來的）落公園坐下，我幾個月前答應過一定要搵日好天再帶珍寶落公園坐下，只不過一路連住落的 business trip 令呢個計劃推遲了幾個月。沿路經過我埋葬牛丸帶子同雞子個位時珍寶好似突然激動，但我當然唔明咩事。

    琴晚，晚飯後，珍寶開始有異常，好似食興奮劑咁，係咁咬籠同埋爬籠，仲似乎受到分隔籠旁邊的芬達影響要係轉轉上面跑（佢有好幾次失敗爬唔上去，我幫手但佢唔要，落返來再自己試到得為止，真係好似人果種硬頸性格）。換轉係一年之前，我絕對唔覺得奇怪，但對於而家已屬風燭殘年的珍寶來講可以話係體能勁得有 D 唔尋常。我同女友放佢床上安撫佢就睡到好似 BB 仔咁，放返入籠又會再繼續，其實我同女友都有諗過係唔係迴光反照呢？

    我本來就唔係早睡之人，叫做搞到半夜兩三點先上床，見珍寶仲係咁衝於是又再安撫一下佢，我腦海中閃過一個念頭，會唔會其實佢知道自己生命即將到盡頭所以有呢種恐懼…？但基於我星期五仲要返工關係我都暫時放佢返入去，然後到我休息一下。當然我自從 19 號返香港後擔心珍寶所以經常會隔兩三個鐘醒一醒觀察一下佢，朝早六點見佢仍有衝勁就餵多 D 食物，而佢亦都食唔少。

    女友八點幾起身，望見珍

寶唔再好似前一晚咁衝，只見佢比較慢的在籠中走動，並且整理自己的毛髮。我九點半起身，繼續一如往日早上人手幫珍寶餵水（佢會反抗所以都唔易搞），就知道出問題，只見佢唔再有平常應有的反應，雖有呼吸但身體再無其他活動。根據之前見過帶子的經驗，我知道珍寶已在彌留之際，但因為我仲要返 office 開工所以用手提箱帶住佢衝返 office。

    唔知係咪真係咁橋，有人今日唔係 office 開工，有人晏返，原本約了我做 maintenance work 的 vendor 又遲，於是我返到 office 後仍然可以全程陪伴珍寶。珍寶三十幾個月的生命裡面，有差唔多一半時間係獨身；最初 2010 年來到就同牛丸同住，一年多 D 後牛丸離世，但因為佢同隔離的雞子合不來於是只可以俾珍寶獨立居住，帶子就同雞子繼續； 直到舊年 5 月尾雞子過身，帶子身上已再無雞子的氣味，於是兩個居然又可以再繼續同住。珍寶同帶子分隔年半有多再重遇，生活亦非常好，只係好景不常，五個半月後帶子過身就再次獨身。珍寶成為第一期養的倉鼠中留守到最後的一位。有此緣故，我希望盡最後努力去陪伴佢。

    返到 office 前其實有小插曲：我平日返工路過的公園正正係我葬其餘幾位鼠鼠的地方（魚旦仔除外），當我帶住珍寶經過時佢突然手腳都有一 D 動作，唔知係咪有所感應。

    10:44AM，進入彌留狀態一個多小時後，珍寶在沒有痛苦的情況下在我掌心中安詳離開，好寶寶來我家 33 個月又 4 日後便化身天使離開。雖然前一段日子我注意到狀況時已有心理準備，並且都假設每一日都係珍寶的最後一日咁去好好照顧佢，但當果一刻真係來臨時我真係覺得好傷感，因為我的確係好唔捨得。

    珍寶 BB，希望你永登極樂，不需要再有任何記掛，而我亦會將所有點滴記於心裡。

P.S. 珍寶亦創下 record，佢同我和女友都過了三次生日，暫時仲未有其他鼠做到。