回家

　　 終於，終於真係返屋企，歷時 34 日的日本公幹（其實都玩了差不多一半的日子 :P），呢次離家破晒記錄，我記得對上一次連續離港咁多日係十年前，當年係去廣西公幹 4 個星期，今次僅僅多出幾日，哈哈…

　　日子咁長，去過的地方自然唔少：成田市（千葉）、東京都、名古屋市（愛知）、豐橋市（愛知）、大阪府、京都府、奈良市（奈良）、日光市（栃木），當中部份地方更去多過一次。由於大部份時間係一人行（僅名古屋及京都與同事同行），所以好 free 咁亂行亂撞，我有理由相信呢個 trip 裡面單單係步行時數超過 100…因為好多時我都係選擇去交通無咁便利，又或者係景區範圍極大的地方，我估同女友去未到 1/3 佢實發難 XDDD

　　大阪同京都其實五年前同兩個妹來旅遊去過，但我覺得係走馬看花（梗係，佢兩個當時來大阪主力去睇安室演唱會嘛！！），今次重遊京都，感覺良好（連續兩個 weekend 都有去，哈哈），至於大阪我只係逗留兩日多 D，加上遇上日本黃金週假期人太多，我覺得未夠皮，有機會可以再去（因為最難搞的都去過，所以其餘地方同女友去都得 XDDD）。今次係大阪有幸係酒店見識到日出，酒店位處 Bay area 兼屬高層望海，朝早起身去洗手間時無意望見，我做了個好瘋狂的舉動－爬出 24/F 窗外果個極矮緊急逃生圍牆影相兼自拍 XDDD 事後當然俾女友鬧，生日正日玩 D 咁高危活動 😛 但我覺得呢種機會真係可遇而不可求….

　　今次新去而又涉足時間比較短的有奈良市及日光市，奈良我只係行大半日，覺得有些少似京都但偏舊，值得日後再去探索一番；至於日光市絕對係無意中發掘出來的新路線，我原意只係想去鬼怒川溫泉過一晚夜，點知去到先發覺「來得太遲」，熱愛京都式舊街道及山野地區的人真係唔可以錯過日光市，時間所限我只能到訪最近車站，被列入世界文化遺產的二社一寺，尚有其他例如內陸湖泊、日本三大著名瀑布之一華嚴瀑布等都係呢個市內。整體感覺比起去京都更佳，我覺得有機會的話應該要再花 2-3 日時間係呢度深入探訪下。

　　名古屋市我就覺得有 D 悶，除了名古屋城外好似無乜特別觀光地點，大半日就覺得悶 😛

　　除了日光市係有興趣外，另一個未去過但有 D 吸引的就係位於千葉南部的房總半島，之前一路都唔起眼但睇睇下發覺好似呢個鄉下地方都隱藏住極高遊玩性質，希望有機會去下。

　　BTW，已 confirm，一星期後再次公幹，地點仍然係日本！！