2012 回顧

　　2012 完結了十幾日，而家先有 D 空閒及心機去回顧一下過去一年，第一件事當然係翻睇舊日記，今次已經係第 11 次在 OD 寫年度回顧，除了第一次的 2002 年大部份時間仍在大學生涯（最後一年），往後都係離開象牙塔後的記事。換言之，我已經係「社會大學」打滾了 10 年，所以今次係寫年度回顧同時，亦約略係某 D 重點去睇下到底如何滄海變桑田。

　　基本生活，由於 2011 年已買樓，有自己固定居所，變化心微係屬預期之內。舊年年尾開始決定學車，二月考試 failed，七月成功補飛，取得貨 van 牌照，因為有公司車位可用緣故所以我已經開始物色二手車，但暫時未選係好積極咁去做。過去呢十年，頭幾年繼續住我媽屋企，及後同我妹出外合租房屋，然後同女友租屋同居直至舊年買樓，已經算經歷了一次大起伏，刻下屬平靜期，我預計 2013 亦唔會出現特別大變化。

　　健康狀況方面，算係叫「小病是福」格局，印象中近兩三年都無大病，對上一次係醫院都已經係 2008 年的事（2010 做大腸檢查雖然要過夜但唔算真係病我唔計啦）。其實呢十年來我都只係因病入過兩次醫院，不過傷風感冒鼻敏感真係家常便飯，年年都會因為呢 D 事睇十幾次醫生。欠缺運動呢下真係好明顯，從畢業果幾年 keep 住有行山去 camp，到而家郁都唔想郁，唔止人肥多病，連筋骨都差，腰背痛得比較密。

　　財政方面，過完買樓的第一年後終於可以期望自己儲多 D 錢，數字上年頭年尾差距似乎不大，第一個錯覺就係自己好似儲唔到乜咁，雖然有少量信用卡分期要還但都無理由會咁。諗深一層，自己另外仲有個供樓戶口，每月供款當中有大部份係自己真正資產呢，所以都可以話有唔少進賬喇（不過幾個月前收到繳稅單時就…. x_x）。關於錢財呢一點，近十年都係走穩健路線，畢業頭幾年仍有 cash is king 概念，加上絕少使用 credit card，可謂絕對保守份子‧前幾年開始放寬一下，容許自己抽部份資金作投資，但都係以穩健類型為主，希望能追到一下通脹；當然，最大投資自不然就係舊年買樓一事啦！！明知係數字遊戲但見到自己住緊果個單位價格升近 50% 多少都會暗中歡喜一下 😛

　　情感上，同女友已經同居三年幾，有種好似老夫老妻感覺，女友對此當然表示不滿，間中都有嘈過，加上佢同我屋企人關係唔好，我被夾係中間總會覺得好辛苦。經過好幾年潛移默化，我覺得同女友的關係始終都係算慢慢向好方面，所以年底時腦海中已經浮現一個準備結婚的念頭（但十劃仲未有一撇丫&#6

5289;。至於我同屋企人的關係，特別係同我兩個妹，我知道近幾年係差了的。十年來，其中一件事我覺得無做錯的，就係前年決定睇醫生並食幾個月藥去解決我呢十幾廿年裡面的情緒病，女友曾經反對用藥的，但我知道生理上都需要有配合先能解決問題，結果證明我個堅持係無錯的，雖然而家偶然都會有 D 老毛病出現，不過程度及頻率遠不及以前。

 　　工作部份，今年算係停滯不前，人手唔夠兼且只得好多好普通的事，極難搵到爭取上游的機會。感覺上呢十年大部份日子都有呢個問題，唔係我唔想向上爬，而係我一直都無法搵到機會，今次呢份工係人生中第 6 份工作，公司大就真係好大，不過我又係唔知要到何年何月先有得諗升職呢個問題。今年繼續有工作相關的外遊，人生中出現首次到訪美國及印度的機會，初次體驗長途機 business class，一切都係新鮮的 😛

　　至於近幾年先再有養的小動物，賓尼兔 Mary 轉眼就歲半，大隻到不得了，年中去完美國公幹後帶佢去做絕育以防出現雌兔獨有的癌症病患。倉鼠果邊，09 年至今共養 5 隻，魚旦仔及牛丸分別於 10 及 11 年離世，雞子同帶子則於今年 5 月 22 及 11 月 10 日離開我。比較令人意外的係當我同女友以為平時最肥肥白白的帶子會係留守到最後時，佢竟然係無先兆情況下話走就走（或者咁就叫世事無常？），現只餘下珍寶一個，不過佢同我兩個渡過了第三次聖誕節同新年後亦意味著佢都跟我 27 個月，老態亦都漸現，我當然都會好小心地繼續照顧佢。

　　唔知下一個十年的回顧仲有無機會繼續係呢度寫呢？