帶子走了

　　自從半年前雞子離開之後，珍寶同帶子呢兩個一同來我家的小兄弟再次一齊住（今次竟然無打交），以帶子果種驚人食量同埋龐大身形來睇，我都認為佢會係「留守」到最後果個，因為同一時間點睇珍寶都係好似無乜長大咁。

　　不過約一兩個月前，一個準備轉涼的時刻，珍寶長出細密及色澤良好的「白色冬裝」，而 Mary 兔又換毛完成時，我見到帶子身上 D 毛並未有太大改變，就諗到係咪已經差唔多到盡頭呢？不過去完印度美國 business trip 返來，帶子仍然活潑精靈，就無特別為意，但我呢段時間就開始多經常去檢查佢兩個狀況。

　　琴日係星期五，收工後去同幾位中學同學食飯兼收紅色炸彈，飯局後再去玩陣先返屋企，兩點幾沖完涼時見到帶子係度跑轉轉，不過速度大不如前，另外我餵食時佢仲係好似平時咁一馬當先，一 D 都唔似有問題，所以我放了個新買的小型布袋入去俾佢同珍寶睡覺，而我就玩陣電腦等頭髮乾。

　　清晨四點多 D，我準備訓覺，一如近日慣例，訓覺前例必去睇下兩隻鼠鼠，見到珍寶唔入睡袋我以為 size 唔夠大所以佢唔入去，到我打算捉帶子出來換屋時就發覺有異樣！！其實珍寶同帶子兩個有時訓覺會郁都唔郁睇落好似死了一樣，但係今次見住帶子張開眼唔郁，身體又軟綿綿，後來 Mary 跳上檯推跌帶子個「睡袋」時就見到好多食物，帶子身上的頰囊已摸唔到有食物的感覺。此刻我知道帶子大限已到，估唔到只係隔兩三個鐘就突然有咁大變化，之前帶子一直做一個以身軀為同伴取暖的角色，所以我決定用我掌心的溫熱來送佢走最後一段路。大約 5:15AM 時我叫佢不用辛苦地撐，想走便走吧，唔知佢係咪聽得到我講說話，幾分鐘之後佢睜大眼並作出數次抽畜後便離我而去。

　　我真係好傷心，想唔到咁短時間內會出現咁大變化。餘下的同伴珍寶我同樣擔心，之前佢同牛丸同住，牛丸過身後因為帶子同雞子一同住，而珍寶又夾唔到果邊所以悶足半年直至雞子逝世後先可以再同兒時伴帶子再次「同居」，想唔到六個半月後會係帶子先行一步。

　　二十五個半月的時光眨眼就過去，我同女友都好感激帶子給我們的歡樂及幸福感，而佢 so far 亦係唯一一個絕不與同類打交又無咬過人的乖寶貝，願佢能到彩虹橋回復最壯碩時期的身驅，與魚旦仔、牛丸同埋雞子一齊享天國之福吧！！