無間道

　　回想起幾日前同老細坐低一對一的傾談，忽然之間覺得好像就是無間道。唔係話咩有人出賣邊個點點點，而係突然驚覺，由細個開始到而家，不論係學業個人發展或事業模式的行進都如出一轍。而家我的阿頭，無可否認係一個非常出色的領導者，賞罰分明，對下屬要求嚴格，但我有時就覺得會唔會係太過火？另一個問題，就係佢忽略了其實我加入公司接近兩個年頭，都未曾正式有過乜 training，我只能從公司發生過的事件去學習，偏偏香港的 site 相比其他地區係算好細，變成有 D 事可能應該一早知但到今時今日都未知…但老細覺得我唔識就係錯。

　　眼見兩位其他國家新請來同樣跟我呢個老細的人，level 同我一樣咁高，但未上場老細就已經計劃了連續幾個月的 training plan 出來，有時我真係好想知….點解永遠都係咁？之前有一份工，老細一樣好勁好嚴格，我同樣靠自己摸石頭過海般去解決一切問題，不過距離升遷仲有好大段路……至於讀書時期，前幾篇早已寫過，好似「無師自通」就成為我的寫照，好似我永遠脫離唔到呢種模式。

　　無師自通只能為我帶來雜而不純的經驗，對於而家的工作來講無法集中火力抓緊一項技能無疑就係將升遷呢個路標拉遠；此刻我對於無法擺脫呢種 looping 狀況感到好痛苦，因為我知道咁樣同「一事無成」實際上差距不遠…