又係我錯？

　　早兩日個妹打來，話我老豆搵過我幾次都無覆電話，其中我知道多半係一般電腦問題，而我都曾經不下幾百次提到過唔係我唔想幫，只係我住得遠，又經常出差，如果有相熟的就算技術無我咁好都可以幫下手解決問題，但佢永遠都唔會咁做。另一個問題係，我亦講過幾百次要佢去工聯會學下 D 基礎電腦，既然佢經常見到朋友用到部電腦點點點，咁自己想要做就要學啦，佢又硬要多多推搪但同時又多要求（我媽都唔識電腦，但佢只會用電腦開 e-banking 睇下股票價格，所以只要講一次就 OK），又時我都覺得真係好煩….

　　個妹又話自己部 notebook 有 D 問題，我聽完描述後覺得似 OS 問題建議佢部 notebook 先做 backup 後做 recovery，之後又話自己無 USB HDD 又點點點，又話會擺低部電腦去阿媽屋企叫我拿去整。我同佢講，買隻 HDD 都唔貴，兼可以定時做 backup 不知幾好，但講到尾佢都係話自己無時間又乜又物，唔通我 D 時間無佢果 D 咁矜貴？所以最後我都拒絕…

　　無幾耐之後就見佢 facebook 掛住一句「親情紙咁薄」的 status，我都無特別去出聲，不過真係覺得好唔合理。由幾時開始我一定要奉旨接 order？細個開始我已經有個主張係：你唔識做，如果我覺得你能做得到，我會教你，但唔好期望我會事事參與。我唔覺得買隻 USB HDD 去抄 file 有幾難，無一個特別一定非我做不可的理由存在；另外就係，呢兩年我女友都受盡兩個妹的白眼，做阿哥的我都無大吵大鬧，而家竟然咁樣話返我轉頭？究竟邊個涼薄？男友／老公說話就係真理，大佬的肺腑之言就係狗吠？呢幾年搞出咁多事，真係難怪我唔想經常出來見面….